Samkvæmt kjarasamningum ber atvinnurekendum að greiða starfsfólki sínu desemberuppbót í byrjun desember ár hvert. Uppbótin er háð ákveðnum skilyrðum sem varða t.a.m. starfstíma og starfshlutfall á yfirstandandi ári. Desemberuppbót skal greiða í einu lagi og ofan á hana reiknast ekki orlof. Um er að ræða fasta krónutölu sem tekur ekki hækkunum skv. öðrum ákvæðum kjarasamninga. Áunnar uppbætur skal gera upp samhliða starfslokum.
Hér að neðan má sjá upphæðir fullrar desemberuppbótar skv. aðalkjarasamningum en félagsmönnum er jafnframt bent á nýjar reiknivélar þar sem hægt er að reikna út eigin desemberuppbót út frá kjarasamningi, starfstíma og starfshlutfalli viðkomandi.
Almennur vinnumarkaður (reiknivél)
Desemberuppbót er 106.000 kr. miðað við fullt starf og greiðist í síðasta lagi 15. desember. Þeir sem eru í starfi fyrstu vikuna í desember eða hafa verið samfellt í starfi hjá atvinnurekanda í 12 vikur á síðustu 12 mánuðum eiga rétt á uppbót. Fullt ársstarf miðast við 45 vikur eða 1.800 klst. á tímabilinu 1. janúar til 31. desember.
Ríki (reiknivél)
Desemberuppbót (persónuuppbót) er 106.000 kr. miðað við fullt starf og greiðist 1. desember. Þeir sem eru við störf fyrstu viku nóvember eða hafa starfað í 13 vikur samfellt á árinu skulu fá greidda desemberuppbót. Full uppbót miðast við fullt starf tímabilið 1. janúar til 31. október.
Sveitarfélög (reiknivél)
Persónuuppbót í desember er 135.500 kr. miðað við fullt starf og greiðist 1. desember. Greitt skal hlutfallslega miðað við starfshlutfall og starfstíma síðustu 12 mánuði fyrir greiðsludag.
Sjá nánar í kjarasamningum viðkomandi aðila.
